Mahad-Celin Ku Socota Wasaarada Ganacsiga Soomaaliya Oo Ka Hortageysa Khatarta Taabuuga.

0
453
Taabuu Waa Daroogo Aad U Khatar Badan.

Soomaaliya waxa ay ka mid tahay dawladaha Islaamka, dadkeeduna waa muslimiin 100% sidaas darteed ayey shareecadooduna tahay diinta Islaamka, waxaa ka xarriman wax kasta oo uu sharcigu xarrimay.

Waxyaabaha shareecadeenna xaniifku mamnuucday ee la xiriira beec mushtarka waxaa ka mid ah ka ganacsiga daroogada nooc kasta oo ay ahaataba.

Waxaa dhawaanahaan dalka ku baahay nooc ka mid ah daroogooyinka dilaaga ah oo lagu magacaabo “Taabuu”, noocaan daroogada ah ayaa dalka lagu soo geliyey qaab ganacsi waxa ayna si fudud ugu dhex faaftay qaybaha bulshada oo ay dhallinyaradu ugu badan yihiin.

Wershadaha soo saara daroogadaan ayaa qolofka kore ku soo qoray halkudhig ay ku muujinayaan waxyeelladeeda kaas oo ah “Way ka khatar badan tahay sidaad malaynayso” halkudhigga ayaa ku qoran labada luuqadood ee Ingiriiska iyo Carabiga.

Wasaaradda Ganacsiga ayaa mamnuucday soo dejinta Taabuuga iyada oo u danaynaysa bulshada Soomaaliyeed oo ay daroogadaasi dhibaato weyn ku hayso.

Waxaa jiray qaylo dhaan ka soo yeeraysay culumada, aqoonyahannada iyo waxgaradka Soomaaliyeed ee ku aaddan adeegsiga daroogadaan dilaaga ah ee Taabuuga.

Waxaan u mahadcelinayaa Wasaaradda Ganacsiga oo qaadday tallaab muhiim ah kuna badbaadinaysa caafimaadka da’ yarteenna, waxaan kaloo ammaan iyo abaalba u haynaa intii ka digtay waxyeellada daroogadaas.

Halkan Hoose Ka Daalaco Tix-Gaaban Oo Aynu Ku Cabireyno Waxyeeladda Taabuuga.

Midka qooshay dhunkaashee

Inta Markab soo dhaansha

Dhul shisheeye ka keenay

Dhallinteen ku dhagraayo

Dhalanteedka badaayo

Caafimaadna dhantaalay

Rabbiigeen dhulka uumow

Raasumaalka dhaqaaliyo

Dhitadii bankiyeede

Dheecaanka daroogiyo

Wax dhacay uu ku keenay

Dhibic aadan ka reebin

Dhadhankii tubaakee

Dhibka ay wadataana

Dusheed ay ku dhignayd

Midka dhuuni ka doonee

Sunta keenay dhulkeennoo

Dhallinteen ku dhex baahshay

Rabbow uu dhintaa oo

Tiisu ay dhammaatoo

La dhaxlaa hantidiisa.

FG: Fadlan faafi oo badbaadi dadkaaga.

W/Q:- Ustaad Cabdulqaadir Maxamed Xasan.